“Qida təhlükəsizliyi haqqında” Qanunun icrasının təmin olunması məqsədilə Polşa, Litva və Braziliyadan Azərbaycana yüksək risk qrupuna aid edilən heyvan mənşəli qida məhsullarının idxalı ilə məşğul olan şirkətlərin nümayəndələri ilə görüşlər keçirilib.

Azərbaycan Qida Təhlükəsizliyi Agentliyinin məlumatına görə, onlara yüksək riskli qida və yem məhsullarının idxalı sahəsində həyata keçirilən tədbirlər barədə ətraflı məlumat verilib. Lakin adıçəkilən ölkələrdə fəaliyyət göstərən müəssisələrdən Azərbaycana məhsul idxal olunmasına, eləcə də dəfələrlə xəbərdarlıq edilməsinə baxmayaraq, Agentliyə bu ölkələrin istehsalçılarından təsdiqlə bağlı müraciətlər daxil olmayıb.

Bununla əlaqədar 2023-cü il noyabrın 15-dən təsdiq üçün müraciət etməyən, Polşa, Litva və Braziliyada fəaliyyət göstərən müəssisələrdən ölkəyə yüksək riskli qida məhsullarının gətirilməsinə məhdudiyyət tətbiq olunacaq.