Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti tərəfindən müvafiq qurumlarla birgə Ünvan Reyestri İnformasiya Sisteminin (ÜRİS) formalaşdırılması üzrə işlərə başlanılıb.

Dövlət Xidmətinin məlumatına görə, sistemin formalaşdırılması üçün ilk növbədə muxtar respublikanın inzibati ərazi vahidlərinin sərhədləri aidiyyəti üzrə göndərilib. Daha sonra ÜRİS yerləşdirilməsi məqsədilə Naxçıvanın poçt məntəqələrinin sərhədləri muxtar respublikanın Rabitə və Yeni Texnologiyalar Nazirliyi ilə birlikdə müəyyənləşdirilərək hazırlanıb.

Qeyd edək ki, sistemin formalaşdırılması üçün Naxçıvan şəhərinin, Əliabad qəsəbəsinin və şəhərin 5 kəndinin ünvan xəritəsi, həmçinin yeni yaranacaq nəqliyyat infrastrukturu obyektlərinin başlanğıc və son nöqtələri müəyyənləşdirilərək ünvan xəritələrinin layihələri hazırlanıb və baxılması üçün Naxçıvan Şəhər İcra Hakimiyyətinə göndərilib.

Muxtar respublikada ÜRİS-in formalaşdırılması məqsədilə qarşıdakı dövr ərzində də işlər davam etdiriləcək.