“Sahibkarlığın İnkişafı Fondundan aldığımız 70 min manat kredit hesabına istehsalımızı artıra bilmişik”.

Bunu “Azərbaycan iqtisadiyyatı” Teleqram kanalına 2010-cu ildən sahibkar kimi fəaliyyət göstərən Elman Allahverdiyev bildirib.

Hazırda Xəzər rayonunun Qala qəsəbəsində sahibkarlıq fəaliyyəti ilə məşğul olan E.Allahverdiyevin sözlərinə görə, işə yeni başlayanda özünə məxsus olan torpaq sahəsində maldarlıq təsərrüfatı yaratmaq istəsə də, sonradan quşçuluq sahəsi üzrə fəaliyyət göstərmək qərarına gəlib. Buna səbəb isə quşçuluqda dövriyyənin qısa zaman ərzində artırıla bilməsidir: “Quşçuluq sahəsi riskli sahə olsa da, tez bir zamanda inkişaf gedir. 27-28 günə məhsulu satışa çıxarmaq mümkündür. Mən bu işə sıfırdan başlamışam. Əvvəl bir ayda 5-6 min toyuq saxlamaq imkanım var idi. Daha sonra bu rəqəmi 12-13 minə qaldırdım. Artıq bir ay ərzində 27-28 min toyuq saxlaya bilirəm. Əsas müştərilərimiz broyler müəssisələridir. Dövlətdən aldığımız kredit biznesimizin inkişafına çox böyük kömək edir. Kredit hesabına toyuqlar üçün saxlanma yeri tikmişəm. Bu imkan verir ki, əlavə olaraq, 13 min diri toyuq saxlayım. Məhsullarımız, hələ ki, daxili bazar üçündür. Amma çalışacağıq ki, istehsalımızı artıraq və xarici bazara çıxışımız olsun. Dövlətimiz də bunun üçün bizə yardım edir”.

E.Allahverdiyev qeyd edib ki, Qala qəsəbəsində ona məxsus olan 70-80 sot ərazidə üzüm bağı salmaq istəyir. Bundan əlavə, sahibkar Xaçmazda da quşçuluq fəaliyyəti ilə məşğul olmağı, eyni zamanda orada gilas bağı salmağı planlaşdırır.