Bu ilin yanvar-sentyabr aylarında ölkədə 15,9 milyon manat dəyərində əczaçılıq məhsulları istehsal edilib.

"Azərbaycan iqtisadiyyatı" Teleqram kanalının Dövlət Statistika Komitəsinin hesabatı əsasında apardığı hesablamalara görə, bu, bir il öncəki müvafiq göstəricini 50 faiz və ya 5,3 milyon manat üstələyir.

Hesabat dövründə pərakəndə ticarət şəbəkəsində əczaçılıq məhsulları və tibbi ləvazimatlara istehlakçılar tərəfindən 929,7 milyon manat xərclənib ki, bu fa ötən ilin müvafiq göstəricisi ilə müqayisədə 12,5 faiz və ya 103,2 milyon manat çoxdur.

Bu ilin sentyabr ayının satışlarının dəyəri isə avqust ayının göstəricisi ilə müqayisədə 29,8 faiz və ya 26,4 milyon manat artıb. Sentyabrda pərakəndə ticarət şəbəkəsində 115,1 milyon manat dəyərində əczaçılıq məhsulları satılıb.

Qeyd edək ki, cari ilin ilk 9 ayında istehlakçıların pərakəndə ticarət şəbəkəsində xərclədiyi vəsaitin 2,3 faizi əczaçılıq məhsullarının alınmasına sərf olunub.

Dövlət Gömrük Komitəsinin hesabatına əsasən isə cari ilin ilk 9 ayında ölkəyə 448,88 milyon ABŞ dolları dəyərində 21,7 min tondan çox əczaçılıq məhsulları idxal edilib. Bu, 2022-ci ilin müvafiq dövrünün göstəriciləri ilə müqayisədə dəyər ifadəsində 5,5 faiz və ya 25,98 milyon dollar az, həcm baxımından isə 5,1 faiz və ya 1,05 min ton çoxdur.

2023-cü ilin ilk 9 ayı ərzində əczaçılıq məhsullarının ümumi idxalda xüsusi çəkisi 3,56 faizə bərabər olub.