“Çin Transxəzər beynəlxalq nəqliyyat dəhlizində iştirak edəcək”. Bu sözləri Çin Xalq Respublikasının Sədri Si Cinpin Pekində keçirilən 3-cü “Bir kəmər, bir yol” beynəlxalq əməkdaşlıq forumunun açılış mərasimində çıxışı zamanı söyləyib.

“Xinhua” agentliyinin məlumatına görə, Si Cinpin qeyd edib ki, eyni zamanda, Çin-Avropa dəmir yolunun inkişafı ilə bağlı işlər sürətləndiriləcək.

Onun sözlərinə görə, Çin digər tərəflərlə birlikdə Avrasiyada birbaşa dəmir və avtomobil yolları ilə bağlı olan yeni logistika dəhlizi quracaq. “Biz “Dəniz İpək yolu” çərçivəsində limanları, gəmiçilik və ticarət xidmətlərini güclü şəkildə inteqrasiya etməyi, Yeni Beynəlxalq Quru-Dəniz Ticarət Dəhlizinin və “Hava İpək yolu”nun qurulmasını sürətləndirəcəyik”, - deyə Çin lideri əlavə edib.

Qeyd edək ki, Pekində 3-cü “Bir kəmər, bir yol” beynəlxalq əməkdaşlıq forumu işə başlayıb. Azərbaycanı forumda energetika naziri Pərviz Şahbazovun rəhbərliyi ilə nümayəndə heyəti təmsil edir.