Bu ilin yanvar-avqust aylarında ölkənin kimya sənayesi sahəsində 1 027,7 milyon manat dəyərində məhsul istehsal edilib ki, bu da ötən ilin eyni dövrünün göstəricisini 6 faiz və ya 61,6 milyon manat üstələyir.

"Azərbaycan iqtisadiyyatı" Teleqram kanalının Dövlət Statistika Komitəsinin hesabatı əsasında apardığı hesablamalara görə, cari ilin iyul ayı ilə müqayisədə avqustda istehsal dəyərində 12,4 faiz və ya 16,7 milyon manat artım qeydə alınıb. Avqust ayında 151,4 milyon manatlıq kimya sənayesi məhsulları istehsal edilib.

Ümumilikdə cari ilin ilk səkkiz ayında kimya sənayesi, əczaçılıq məhsullarının, rezin və plastik kütlə məmulatlarının istehsalı sahələrində 1 453,3 milyon manatlıq məhsul istehsal edilib. Ötən ilin müvafiq dövrü ilə müqayisədə rezin və plastik kütlə məmulatlarının istehsalı 20,9 faiz, kimya sənayesi məhsullarının istehsalı 6 faiz, əczaçılıq məhsullarının istehsalı isə 2,8 faiz artıb. Kimya sənayesi məhsullarından polietilen istehsalı 34 faiz, etilen istehsalı 33,1 faiz, propilen istehsalı 28,6 faiz, rezin və plastik kütlə məmulatlarından plastmas butulkalar, flakonlar və oxşar məmulatların istehsalı 2,3 dəfə, sərt plastmasdan borular, borucuqlar, qolçaqlar və şlanqların istehsalı 31,3 faiz, plastmas çubuqlar, millər və profillərin istehsalı isə 11,2 faiz artıb.