Bu ilin yanvar-iyun aylarında bank sisteminin kredit portfeli 8,7 faiz və ya 1,7 milyard manat artaraq 21,3 milyard manata çatıb.

"Azərbaycan iqtisadiyyatı" Teleqram kanalı Azərbaycan Mərkəzi Bankının cari ilin birinci yarısına dair “Maliyyə sabitliyi hesabatı”na istinadən xəbər verir ki, kreditləşmənin bütün seqmentləri üzrə müsbət dinamika müşahidə edilib.

Belə ki, hesabat dövründə biznes kreditləri 7,3 faiz (795 milyon manat) artaraq 11,7 milyard manata, ipoteka portfeli 11,3 faiz (336 milyon manat) artaraq 3,3 milyard manata çatıb. İpoteka krediti portfeli üzrə artımın 45 faizi (150 milyon manatı) dövlət vəsaiti hesabına verilən kreditlər, 55 faizi (186 milyon manatı) isə bankların daxili vəsaiti hesabına formalaşıb. Dövr ərzində istehlak kreditləri portfeli isə 9,9 faiz (571 milyon manat) artaraq 6,3 milyard manat təşkil edib.