Azərbaycanın “AzerTelecom” və Qazaxıstanın “Kazakhtelecom” telekommunikasiya şirkətləri Xəzər dənizinin dibi ilə Azərbaycan-Qazaxıstan marşrutu üzrə Transxəzər fiber-optik kabel xəttinin tikintisi və istismarına cavabdeh olan birgə müəssisə yaradıblar.

"AzerTelecom" şirkətindən verilən məlumata görə, müəssisə “Rəqəmsal İpək Yolu” layihəsinin əsas elementinin – Asiya və Avropa arasında multi-terabitlik məlumat həcmlərinin ötürülməsini təmin edəcək Transxəzər fiber-optik kabel xəttinin yaradılmasına sərmayə yatıracaq.

Hazırda kabel xəttinin yüksək səviyyəli dizayn layihəsi hazırlanıb, detallı yol xəritəsi təsdiq edilib. Tədqiqat işləri bitdikdən sonra optik xəttin tikintisi aparılacaq.

Kabel xəttinin dəniz dibi ilə uzunluğu 380 km, ötürmə qabiliyyəti isə 400 terabit/s təşkil edəcək.