Bu ilin yanvar-iyun ayları ərzində milli standartlaşdırma qurumu olan “Azərbaycan Standartlaşdırma İnstitutu” publik hüquqi şəxs tərəfindən 37 yeni dövlət standartı qəbul edilib.

İnstitutdan “vergiler.az”a verilən məlumata görə, normativ sənədlər müxtəlif sahələr üzrə ölkəyə istehlak olunan məhsulların, məhsul istehsalı ilə bağlı proseslərin və istehsal metodlarının təhlükəsizliyinin və keyfiyyətinin yüksəldilməsi, habelə məhsulların rəqabətqabiliyyətliliyinin artırılması məqsədlərinə xidmət etməklə, elm və texnikanın nailiyyətlərinin, bilik, qabaqcıl təcrübə və yeni texnologiyaların tətbiqinə şərait yaradır.

Hesabat dövründə aqrar və qida sahəsi üzrə 12, ekologiya sahəsi üzrə 5, elektrotexnika və İKT sahələri üzrə 1, kosmetika sahəsi üzrə 3, neft və kimya sənayesi üzrə 3, ağır sənaye və maşınqayırma sahələri üzrə 3, tikinti materialları üzrə 4, qiymətli metallar və qiymətli daşlar üzrə 3, idarəetmə sistemləri sahəsi üzrə 1, təşkilati və metodoloji sahə üzrə 2 dövlət standartı qəbul edilib.
Bununla yanaşı 11 dövlət standartının dövrü yoxlanılması aparılıb və ya dəyişikliklər edilib.

Sahibkarların sifarişi əsasında 92 texniki şərtlər hazırlanıb, ekspertiza edilərək dövlət qeydiyyatına alınıb.