Bu ilin yanvar-iyun ayları ərzində İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində Azərbaycan Standartlaşdırma İnstitutu tərəfindən qəbul edilən yeni dövlət standarlarının sayı ötən ilin müvafiq dövrü ilə müqayisədə 60,9 faiz artıb.

“Azərbaycan iqtisadiyyatı” Teleqram kanalı xəbər verir ki, bu barədə Xidmətin rəisi Məmməd Abbasbəyli “Twitter” hesabında yazıb.

Qeyd olunur ki, cari ildə 37 yeni dövlət standartı qəbul edilib, 28 dövlət standartı ləğv edilib.

“1 beynəlxalq standartın (İSO), 30 Avropa standartının (EN), 11 Rusiya Federasiyasının standartının (ГОСТ Р), 82 Amerika Test Materialları Cəmiyyətinin (ASTM) standartının, 2 Türk standartının (TS), 43 Beynəlxalq Elektrotexniki Komissiya (IEC), 433 Avropa Telekommunikasiya Standartları İnstitutu (ETSI), 2 Qazaxıstan Respublikasının (CT PK) standartının, 11 Amerika Dövlət Avtomobil Yolları və Nəqliyyat İşçiləri Assosiasiyası (AASTO) standartının ölkədə müvəqqəti tətbiqi təmin edilib”, - M.Abbasbəyli əlavə edib.