Bu ilin yanvar-iyun ayları ərzində ölkədə kimya sənayesi, əczaçılıq məhsullarının, rezin və plastik kütlə məmulatlarının istehsalı sahələrində 1016,3 milyon manatlıq məhsul istehsal edilib.

“vergiler.az” Dövlət Statistika Komitəsinin hesabatına istinadən xəbər verir ki, ötən ilin müvafiq dövrü ilə müqayisədə rezin və plastik kütlə məmulatlarının istehsalı 16 faiz, kimya sənayesi məhsullarının istehsalı 3,1 faiz artıb, əczaçılıq məhsullarının istehsalı isə 27,3 faiz azalıb.

Kimya sənayesi məhsulları üzrə etilen istehsalında 53,5 faiz, polietilen istehsalında 54 faiz, propen (propilen) istehsalında 45,8 faiz, rezin və plastik kütlə məmulatlarından plastmas butulkalar, flakonlar və oxşar məmulatların istehsalında 2,4 dəfə, sərt plastmasdan borular, borucuqlar, qolçaqlar və şlanqların istehsalında 36,9 faiz, plastmas çubuqlar, millər və profillərin istehsalında isə 17,4 faiz artım qeydə alınıb.