Son illər neft-qaz sektoruna investisiyaların azalması bazarda sabitlik və dayanıqlı enerji təhlükəsizliyi üçün başlıca risklərdən biridir.

Energetika Nazirliyindən “vergiler.az”a verilən məlumata görə, bunu nazir Pərviz Şahbazov Vyanada “Dayanıqlı və inklüziv enerji keçidinə doğru” mövzusunda keçirilən 8-ci OPEC beynəlxalq seminarında çıxış edərkən deyib.

Onun sözlərinə görə, bugünkü 100 trilyon dollarlıq qlobal iqtisadiyyatın istifadə etdiyi enerjinin 80 faizindən çoxu karbohidrogenlərdən asılıdır və bu asılılığa qısa müddətdə yüksək ambisiyalı siyasi qərarlarla tamamilə son qoymaq irrealdır.

“Qarşıdakı onilliklərdə ətraf mühiti qorumaqla enerji təhlükəsizliyini, ədalətli, inklüziv enerji keçidini təmin etmək üçün bizim rasional qərarlara və təxirəsalınmaz tədbirlərə ehtiyacımız var. Bu isə enerji bazarlarının iştirakçıları arasında dialoq və əməkdaşlıq olmadan mümkün deyil”, - deyə P.Şahbazov əlavə edib.

Nazir Azərbaycanın hazırda enerji təhlükəsizliyində rolunu bir neçə enerji resursu üzrə şaxələndirməsindən, ötən il Cənub Qaz Dəhlizi ilə Avropaya qaz tədarükünün 40 faiz artırılması ilə təbii qazın enerji böhranının həllinə töhfələrindən danışıb.

Bildirilib ki, Azərbaycanın məqsədi hər hansı bir enerji növünün təşviqi deyil, bütün enerji növlərindən doğru istifadə etməklə enerji təhlükəsizliyinə, iqtisadi inkişafa və sabitliyə töhfə verməkdir.

“Biz inklüziv enerji keçidini dəstəkləyirik. Lakin emissiyaların azaldılmasında mühüm rol oynayan “yaşıl enerji”nin dayanıqlığını təmin etmək, bərpa olunan enerjini dəstəkləmək, rəvan enerji keçidi üçün bizim qaza ehtiyacımız var. Hesab edirəm ki, gecikmədən birgə hərəkət etmək vaxtıdır. Gəlin, ayrı-ayrılıqda deyil, birgə, dialoq mühitində enerji bazarlarının inkişafı ilə bağlı doğru qiymətləndirmələr aparaq, gələcək qarşısında məsuliyyətimizi bərabər səviyyədə paylaşaq. Həm qlobal neft bazarının davamlı balanslaşdırılmasının etibarlı qarantı olan “OPEC plus” ölkəsi, həm də Avropanın etibarlı enerji tərəfdaşı olaraq Azərbaycan belə bir dialoqa töhfə verməyə hazırdır”, - deyə nazir qeyd edib.