Özbəkistan Prezidenti Şavkat Mirziyoyev Türk Dövlətləri Təşkilatına (TDT) üzv dövlətlərin hökumətləri arasında sadələşdirilmiş gömrük dəhlizinin yaradılması haqqında sazişin təsdiq edilməsi haqqında qərar imzalayıb.

“vergiler.az” Özbəkistan mətbuatına istinadən xəbər verir ki, saziş 2022-ci il noyabrın 11-də Səmərqənddə Özbəkistan, Azərbaycan, Qazaxıstan, Qırğızıstan və Türkiyə hökumətləri tərəfindən imzalanıb.

Sazişin icrasına cavabdeh olan səlahiyyətli orqan qismində Özbəkistanın İqtisadiyyat və Maliyyə Nazirliyi yanında Gömrük Komitəsi təyin edilib.

TDT ölkələrinin gömrük orqanları bu sazişin qüvvəyə minməsindən sonra altı ay davam edəcək pilot layihə təşkil edəcəklər. Pilot layihənin ilk üç ayı ərzində gömrük orqanları məlumat mübadiləsinin əsas texniki şərtlərini və əməkdaşlığın təşkili prosedurunu razılaşdırmalı, növbəti üç ay ərzində isə gömrük dəhlizinin praktiki icrasını həyata keçirməlidirlər.