Azərbaycanın yeni strateji inkişaf mərhələsində milli iqtisadiyyatın rəqabət qabiliyyətinin və maliyyə dayanıqlılığının gücləndirilməsi, dinamik inklüziv və sosial ədalətə əsaslanan cəmiyyətin formalaşdırılması, ölkənin rəqabətli insan kapitalı və müasir innovasiyalar məkanına çevrilməsi, azad edilmiş ərazilərin sürətli reinteqrasiyası kimi məsələlər hədəflənir.

"vergiler.az" xəbər verir ki, bunu “2030-cu ilə doğru: Azərbaycanda sosial-iqtisadi inklüzivlik” mövzusunda keçirilən İkinci DİM Dialoqunun Gündəliyində çıxış edərkən iqtisadiyyat nazirinin müavini Sahib Məmmədov deyib.

S.Məmmədovun sözlərinə görə, strategiyanın icrası nəticəsində ölkə iqtisadiyyatının hər il orta hesabla 3-4 faiz artması, qeyri-neft-qaz ÜDM-nin illik orta hesabla 5 faiz artımı, habelə özəl sektorun iqtisadiyyatda payının 88 faizə çatdırılması əsas hədəflərdəndir.

"Xüsusilə regionlarda kiçik və orta sahibkarlığın, eləcə də özünüməşğulluğun inkişafına zəruri şərait yaradılmaqla əhali qrupları üçün səmərəli məşğulluğa və layiqli əməyə nail olunacaq",- deyə nazir müavini qeyd edib.

O əlavə edib ki, bununla yanaşı, qeyri-formal məşğulluğa qarşı zəruri qabaqlayıcı və nəzarət tədbirləri gücləndiriləcək. Qadınların iqtisadi imkanlara çıxışı yaxşılaşdırılacaq: “Qadınların cəmiyyətdə iqtisadi fəallığının artırılması istiqamətində genişmiqyaslı tədbirlər nəzərdə tutulur",- deyə S.Məmmədov bildirib.