Özbəkistanda ümümilli lider Heydər Əliyevin 100 illik yubileyinə həsr olunmuş "Caspian Energy Investment Forum Tashkent 2023" keçirilib.

“Caspian Energy Club”dan “vergiler.az”a verilən məlumata görə, Forumun əsas mövzuları Özbəkistanın investisiya potensialı və ölkənin inkişaf modeli, “Yeni Daşkənd” layihəsinin imkanları, investisiyalar, İT layihələrin imkanları, Orta dəhlizin inkişafı, “yaşıl enerji” tranziti, enerji təhlükəsizliyi, ixrac və idxal imkanları olub.

Forumda Özbəkistanın dövlət qurumlarının, ölkədə akkreditə olunan diplomatik və beynəlxalq missiyaların rəhbər və nümayəndələri, həmçinin Xəzər, Qara dəniz və Baltikyanı region ölkələrindən dövlət və özəl şirkətlərin top-menecerləri iştirak ediblər.

Forumun məqsədi ikitərəfli iqtisadi əlaqələrin inkişafı, peşəkar problemlərin həlli üçün beynəlxalq səviyyədə B2B şəbəkənin yaradılması, xarici sahibkarlar və investorlar üçün yaradılan imkanların işıqlandırılması olub.