Rusiya Azərbaycan tərəfinin iştirakı ilə üçtərəfli formatda Şimal-Cənub marşrutu üzrə dəmir yolu infrastrukturunun və yük daşımalarının inkişafı sahəsində əməkdaşlıq haqqında sazişin hazırlanmasının tezliklə başa çatacağına ümid edir.

“Azərbaycan iqtisadiyyatı” Teleqram kanalı xəbər verir ki, bunu Rusiya və İran hökumətləri arasında sazişin imzalanması mərasimində videobağlantı vasitəsilə çıxışı zamanı Rusiya prezidenti Vladimir Putin deyib.

Saziş Şimal-Cənub beynəlxalq nəqliyyat dəhlizi üzrə daşımaların inkişafı məqsədilə İranda Rəşt-Astara dəmir yolunun yaradılması üçün malların və xidmətlərin layihələndirilməsi, tikintisi və təchizatının maliyyələşdirilməsində əməkdaşlığı nəzərdə tutur.

Vladimir Putin qeyd edib ki, bu, üç ölkə - Rusiya, Azərbaycan və İranın gələcək uğurlu koordinasiyası üçün zəruri hüquqi baza yaradacaq.

Rusiya Prezidenti vurğulayıb ki, unikal Şimal-Cənub nəqliyyat arteriyası qlobal nəqliyyat axınının əhəmiyyətli dərəcədə diversifikasiyasına kömək edəcək.

Yeni dəhlizlə daşınma əhəmiyyətli rəqabət üstünlüklərinə malik olacaq. Xüsusilə, malların Sankt-Peterburqdan Mumbaya çatdırılması təxminən 10 gün çəkəcək.

“Müqayisə üçün deyim ki, ənənəvi ticarət marşrutları üzrə bu müddət 30-45 günə qədərdir. Yəni vaxt və xərclər baxımından xeyli qənaət göz qabağındadır”, - deyə o əlavə edib.