Bu ilin aprel ayında Gürcüstan 2500 ton soğan idxal edib ki, bu da ötən ilin eyni dövrü ilə, demək olar ki, eynidir.

“Azərbaycan iqtisadiyyatı” Teleqram kanalı aqrar sektor üzrə ixtisaslaşmış “East-fruit” portalına istinadən xəbər verir ki, bu rəqəm ölkənin Maliyyə Nazirliyinin hesabatında əks olunub. Ümumi idxalın 84 faizini təşkil edən bu kateqoriyadan olan məhsulların ölkəyə aparıcı tədarükçülərinin Rusiya və Azərbaycan olduğu qeyd olunur. Belə ki, ötən ay Rusiyadan 1675 ton (tədarükün 67 faizi), Azərbaycandan isə 425 ton (17 faiz) soğan alınıb.

Bildirilir ki, Azərbaycanda erkən soğan məhsulunun yığımının pik nöqtəsi aprelin ortalarına təsadüf edib.

Türkiyənin də erkən soğan yığımına başlamasına baxmayaraq, faktiki olaraq bu mərhələdə Gürcüstana türk soğanı idxalı yoxdur. Səbəb olaraq türk soğanının digər ölkələrlə müqayisədə baha olması, eləcə də ixrac üçün lazımi sənədlərin hazırlanması ilə bağlı bürokratik əngəllərin olması göstərilir.