Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti tərəfindən 2023-cü ilin yanvar-mart ayları ərzində muxtar respublika üzrə ümumilikdə 2276 daşınmaz əmlak obyekti dövlət qeydiyyatına alınıb.

“vergiler.az” Xidmətin yaydığı məlumata istinadən xəbər verir ki, hesabat dövründə Naxçıvan şəhəri üzrə 974, Şərur rayonu üzrə 381, Babək rayonu üzrə 326, Ordubad rayonu üzrə 104, Culfa rayonu üzrə 201, Şahbuz rayonu üzrə 171, Kəngərli rayonu üzrə 86, Sədərək rayonu üzrə 33 obyekt qeydiyyata alınıb.

2022-ci ilin müvafiq dövrü ilə müqayisədə qeydiyyata alınan daşınmaz əmlak obyektlərinin sayı 29 faiz artıb.

Birinci rübdə qeydiyyata alınan daşınmaz əmlak obyektləri bölmələr üzrə 757 torpaq sahəsi, 65 qeyri-yaşayış binası, 89 qeyri-yaşayış sahəsi, 417 mənzil, 919 fərdi yaşayış evi, 1 çoxmərtəbəli yaşayış binası, 28 əmlak kompleksi təşkil edir.

Hesabat dövründə daxil olmuş müraciətlər əsasında 808 əmlaka dair texniki pasport, 959 torpaq sahəsinə dair plan-ölçü olmaqla, ümumilikdə 1767 texniki sənəd tərtib edilib. Bu da 2022-ci ilin müvafiq dövrü ilə müqayisədə 42 faiz çoxdur. Hüquqi və fiziki şəxslərə daşınmaz əmlakın təsvirinə, bu əmlak üzərində dövlət reyestrində qeydiyyata alınmış hüquqlara və onların məhdudlaşdırılmasına dair 1332 arayış verilib, elektron informasiya sistemi vasitəsilə 599 əmlaka dair məhdudiyyət və yüklülük haqqında məlumat isə notariat ofislərinə təqdim olunub.