2022-ci ilin 9 ayında qeyri-neft sektoruna cəlb edilmiş birbaşa xarici investisiyaların həcmi ötən ilin analoji dövrü ilə müqayisədə 2,4 dəfə artaraq 1,4 mlrd. ABŞ dolları təşkil edib.

“vergiler.az” xəbər verir ki, bunu Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev 2022-ci ilin yekunlarına həsr olunan mətbuat konfransında bildirib.

Onun sözlərinə görə, Azərbaycanda yaradılmış investisiya mühiti ilə bağlı potensial investorların ətraflı məlumat əldə edə bilməsi üçün investisiya bələdçisi ("Investment Guide") hazırlanıb. İxracın və investisiyaların təşviqi üzrə proseslərin idarə olunması məqsədilə CRM (Müştərilərlə Əlaqələrin İdarə edilməsi Sistemi) sistemi, investisiyaların təşviqi üçün yeni "investinazerbaijan.gov.az" rəqəmsal platforması yaradılıb. Qeyri-neft sektorunun müxtəlif istiqamətlərinə xarici investisiyaların cəlbi, biznes və investisiya mühitinin daha da optimallaşdırılması, biznes dairələr arasında ikitərəfli əlaqələrin qurulması məqsədilə Təl-Əviv, Doha, İstanbul kimi şəhərlərdə "Investment Roadshow" tədbirləri (investorlarla ikitərəfli görüş formatında) keçirilib.