2023-cü ilin ilk ayında Azərbaycana 119,1 min turist gəlib. “vergiler.az” Dövlət Statistika Komitəsinə istinadən xəbər verir ki, bu göstərici ötən ilin eyni dövrü ilə müqayisədə 1,6 dəfə çoxdur.

Son statistik məlumatları təhlil edən millət vəkili Vüqar Bayramov turizmin neftdən sonra Azərbaycana ən çox valyuta gətirən sektor olduğunu bildirib. Pandemiyadan öncə illik turizm gəlirlərinin 2,7 milyard dollara yaxın olduğunu xatırladan V.Bayramov deyib:

“Bu sektor məşğulluğa da xüsusi töhvə verir. Bu baxımdan, turizm infrastrukturunun daha da inkişaf etdirilməsi və qiymətlərin optimallaşdırılması Azərbaycana daha çox turistin gəlməsinə imkan yarada bilər. Monitorinqlər göstərir ki, nəinki Bakıda, hətta bölgələrdə də turizm xidmətlərinin qiymətləri yüksək qalmaqdadır. Bu isə həm daxili, həm də gəlmə turizmin inkişafına təsirsiz ötüşmür. 2022-ci ildə ölkəmizə gələn turistlərin sayında artım müşahidə olunsa da, daha qısa zamanda pandemiyadan öncəki göstəricilərinə çatmaq hədəfi qoyulmalıdır”.
V.Bayramovun fikrincə, Azərbaycana gələnlərin əksəriyyətinin qonşu ölkələrin payına düşdüyünü nəzərə alaraq, epidemoloji vəziyyətə uyğun olaraq quru sərhədlərin mərhələli şəkildə açılması məqsədəuyğun olardı. Bu, turizmin inkişafına töhvə verməklə yanaşı, vətəndaşlarımızın xaricə daha asan və az xərclə getməsinə də imkan yaradar.