Bu gün Daşkənddə Özbəkistan-Azərbaycan İşgüzar Şurasının üçüncü iclası keçirilib. Tədbirdə müxtəlif nazirliklər, idarələr və işgüzar dairələrin nümayəndələri iştirak ediblər.

Özbəkistan Ticarət və Sənaye Palatasından verilən məlumata görə, tədbirin əsas məqsədi iki ölkə arasında investisiya və ticarət-iqtisadi əməkdaşlığının daha da inkişaf etdirilməsi, eləcə də işgüzar dairələr arasında əlaqələrin möhkəmləndirilməsidir. Bu məqsədlə Özbəkistan və Azərbaycan üçün prioritet sahələrdə iqtisadi tərəfdaşlığın ardıcıl genişlənməsinə xüsusi diqqət yetirilir.

Özbəkistan Ticarət və Sənaye Palatası sədrinin birinci müavini, İşgüzar Şuranın həmsədri Tura Bobolov deyib ki, son illər Özbəkistan və Azərbaycan arasında əməkdaşlıq və ticarət-iqtisadi əlaqələr fəal inkişaf edir, qarşılıqlı ticarət və birgə biznes layihələrinin sayı sürətlə artır.

İşgüzar Şuranın Azərbaycan tərəfindən həmsədri Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) vitse-prezidenti Vüqar Zeynalovdur.