Azərbaycan pambıq istehsalçıları nüvə texnologiyasına əsaslanan yeni, iqlimə uyğun əkinçilik üsullarına keçiblər. "vergiler.az" BMT-yə istinadən xəbər verir ki, təkmilləşdirilmiş torpaq, gübrə və su idarəçiliyi təcrübələrindən, “Super Pambıq” sortundan istifadə etməklə məhsuldarlığı, pambıq keyfiyyətini və mənfəəti iki dəfə artırmaq mümkün olub. Layihə çərçivəsində məhsuldarlıq ildə bir hektara 3 tondan 8 tona çatdırılıb.

Layihə Atom Enerjisi üzrə Beynəlxalq Agentliyi (AEBA), Ərzaq və Kənd Təsərrüfatı Təşkilatının (FAO) dəstəyi ilə həyata keçirilir. FAO/AEBA-nın Ərzaq və Kənd Təsərrüfatında Nüvə Metodları üzrə Birgə Mərkəzinin torpaqşünası Məhəmməd Zamanın sözlərinə görə, Azərbaycanda ümumi pambıq sahələrinin 105 min hektar olduğunu nəzərə alaraq, hətta iqlimə uyğun əkinçilik üsullarının 10 faiz tətbiqi 31 min tona qarşı 84 min ton pambıq istehsal etməyə imkan yaradacaq.

“Yəni söhbət pambıqçılığın ənənəvi üsullarının nəticələri ilə müqayisədə 166% artımdan gedir. Layihə Azərbaycan iqtisadiyyatının əhəmiyyətli artımına töhfə verə bilər”, - M. Zaman qeyd edib.