Rusiya şirkətləri ölkə istehsalçılarının ehtiyaclarının təmin edilməsi üçün müxtəlif detalların istehsalı məqsədilə Azərbaycanın sənaye parklarının imkanlarını araşdırır.

“vergiler.az” Rusiya mətbuatına istinadən xəbər verir ki, bu barədə Rusiyanın Bakıdakı ticarət nümayəndəsi Ruslan Mirsayapov deyib.

Onun sözlərinə görə, hazırda Azərbaycanda “Ural”, “KamAZ” və “Qazel” avtomobilləri yığılır, kombayn istehsalının lokallaşdırılması məsələləri müzakirə olunub.

“Rusiya və Azərbaycanın kənd təsərrüfatı texnikasının birgə inkişafı və istehsalı üçün böyük gələcək və yaxşı perspektivlər var, xüsusən də Rusiya Federasiyasının azərbaycanlı tərəfdaşları ilə avtomobil sənayesi üzrə əməkdaşlıqda çox yaxşı təcrübə toplanılıb”, - Ruslan Mirsayapov qeyd edib.

O, həmçinin əlavə edib ki, Rusiya tərəfi Azərbaycanda istehsalın lokallaşdırılmasında, o cümlədən üçüncü ölkələrin bazarlarına çıxmaqda maraqlıdır.