Azərbaycanda dövlət-özəl sektor dialoqu çox yüksək səviyyədə təşkil olunub və davam etdirilir.

“vergiler.az” xəbər verir ki, bu barədə Biznes mühiti və beynəlxalq reytinqlər üzrə Komissiyanın “Biznesə daxilolma” işçi qrupunun iclasında çıxış edərkən Beynəlxalq Maliyyə Korporasiyasının (International Finance Corporation - İFC) Azərbaycandakı nümayəndəsi Aliyə Əzimova deyib.

O, özəl sektorun iştirakı ilə daha səmərəli islahatların aparılacağına ümid etdiyini, islahatların hazırlanmasında biznesin yaxından iştirakının vacibliyini vurğulayıb.

“Azərbaycan Respublikasının 2022‒2026-cı illərdə sosial-iqtisadi inkişaf Strategiyası” növbəti 4 ildə yeni sahibkarlara münasibətdə dövlətin daha da asanlaşdırıcı, özəl sektorun isə iqtisadi artımda daha da aparıcı rolunu vurğulayır. Digər ölkələrin təcrübəsi göstərir ki, Azərbaycan kimi kiçik ölkələrin beynəlxalq bazarlarla sıx əlaqələndirilməsi, xarici kapitalın, texnologiyaların, biliklərin ölkəyə gətirilməsi bu artımın təmin edilməsinə çox böyük təkan verə bilər. Burada həm yerli, həm də xarici investorlar üçün eyni zəmin yaratmaq önəmlidir”, - deyə Aliyə Əzimova qeyd edib.

İFC-nin rəsmisi həmçinin şəffaf prosedurların mövcudluğu, biznesin maarifləndirilməsi və məlumat açıqlığının olduqca mühüm rol oynadığını bildirib.

“Sevindirici haldır ki, Beynəlxalq Maliyyə Korporasiyası bu islahat yolunda Azərbaycanla çiyin-çiyinə işləyib və ümid edirəm ki, biz bu əməkdaşlığı davam edəcəyik. Ümid edirəm ki, artıq bu işin biznesə təsirini də görə biləcəyik”, - deyə Aliyə Əzimova əlavə edib.