Xəzərə çıxışı olan Çin-Qırğızıstan-Özbəkistan dəmir yolu açılarsa, Çindən Avropaya, Avropadan da Çinə nəql olunacaq yüklərin daşınmaya görə maya dəyəri aşağı enəcək. Bunu “vergiler.az”a Azərbaycan Dövlət İqtisad Universitetinin dosenti Emin Qəribli deyib.

Onun sözlərinə görə, yeni dəmir yolu istifadəyə veriləcəyi təqdirdə ölkələr arasında yük daşınma dövriyyəsi artacaq. Bu isə həm Azərbaycanın, həm də regionun iqtisadiyyatının inkişafına müsbət təsir göstərəcək.

İqtisadçı hesab edir ki, dəmir yolunun açılması Xəzərdə Ələt ticarət limanının dövriyyəsinin artmasına, eyni zamanda Ələt azad iqtisadi zonasında yeni istehsal müəssisələrinin yaradılmasına səbəb olacaq. Layihənin reallaşması Azərbaycanın strateji mövqeyinin də güclənməsini təmin edəcək.

E.Qəribli layihənin gercəkləşməsi üçün ölkələr arasında mütəmadi görüşlərin keçirilməsini də zəruri sayır.

Çin-Qırğızıstan-Özbəkistan dəmir yolunun tikintisinin Azərbaycanın iqtisadi dayanıqlığına müsbət təsir göstərəcəyinə əmin olan alim ölkəmizin bu layihəni qısa zamanda reallaşdıracağına da inanır: “Son dövrlərdə Azərbaycan kifayət qədər bu tipli böyük layihələrin müəllifi olub və onları uğurla icra edib. Hesab edirəm ki, Çin-Qırğızıstan-Özbəkistan dəmir yolunun açılması da böyük layihədir və böyük uğur olacaq”.

Qeyd edək ki, Prezident İlham Əliyev Azərbaycanla Qırğızıstan arasında Birinci Dövlətlərarası Şuranın iclasında çıxış edərkən Xəzərə çıxışı olan Çin-Qırğızıstan-Özbəkistan dəmir yolunun tikintisi barədə qərarı dəstəklədiyimizi söyləyib. Dövlət başçısı qeyd edib ki, Çin-Qırğızıstan-Özbəkistan dəmir yolu Orta dəhlizin bir hissəsi olacaq.