İndiyədək Sahibkarlığın İnkişafı Fondu tərəfindən 42 minədək sahibkara 2,8 mlrd. manat güzəştli kredit verilib.

Fondun yaydığı məlumata görə, bu kreditlər sahibkarlıq subyektlərinin güzəştli maliyyə resurslarına çıxışını təmin etməklə ölkədə qeyri-neft sektorunun inkişafına, innovativ texnologiyalara əsaslanan yeni istehsal, emal və infrastruktur müəssisələrinin yaradılmasına, ixracyönümlü investisiya layihələrinin maliyyələşdirilməsinə və yeni iş yerlərinin açılmasına töhfə verib.

Fond gələcəkdə müxtəlif maliyyə dəstəyi mexanizmləri vasitəsilə sahibkarların maliyyə əlçatanlığının artırılması istiqamətində fəaliyyətini davam etdirəcək.

Xatırladaq ki, dövlətin iqtisadi siyasətinin həyata keçirilməsində əsas maliyyə institutlarından olan Sahibkarlığın İnkişafı Fondunun yaradılmasından 30 il keçir. Fondun ölkədə sahibkarlığın, xüsusilə kiçik və orta sahibkarlığın inkişafında və işgüzarlığın artırılmasında əhəmiyyətli rolu var.