Astara gömrük-keçid məntəqəsindən böyük yük maşınlarının keçidinin asanlaşdırılması İran ilə Azərbaycan arasındakı ticarət dövriyyəsinin artmasına səbəb olacaq.

Bu sözləri İranın Astara gömrük-keçid məntəqəsinin rəisi Səid Naderi deyib.

O bildirib ki, Azərbaycan tərəfi ilə aparılan danışıqların nəticəsi olaraq yüklərin asan prosedurla gömrükdən keçirilməsi haqqında razılıq əldə olunub.

Qeyd etmək lazımdır ki, yük maşınları (TIR) yalnız İran ilə Azərbaycan arasında yükdaşıma funksiyasını yerinə yetirmir. İrandan yük daşıyan Rusiya və Ukraynaya məxsus maşınlar da Azərbaycandan tranzit olaraq keçir. Gömrük rəsmiləşdirilməsinin asanlaşdırılması vaxt itkisinin qarşısını almaqla yanaşı, gün ərzində daha çox maşının keçməsinə imkan yaradır. Bu isə qış aylarında İrandan sitrus meyvə və tərəvəz daşıyan iş adamları üçün əlverişlidir.

Nəzərə çatdıraq ki, ötən il İran ilə Azərbaycan arasındakı ticarət dövriyyəsinin həcmində 30 faiz artım müşahidə edilib. Yük maşınlarının asanlaşdırılmış prosedurla gömrükdən buraxılması cari ildə iki ölkə arasındakı ticarət dövriyyəsinin həcmini daha da artıracaq.