2018-ci ilin müvafiq dövrü ilə müqayisədə 2019-cu ilin yanvar-fevral ayları ərzində Azərbaycanda qeyri-neft sektoru üzrə ixrac 40 milyon ABŞ dolları və ya 16,5 faiz artıb. İqtisadi İslahatların Təhlili və Kommunikasiya Mərkəzinin "İxrac icmalı"na əsasən, bu ilin ilk 2 ayında Rusiyaya 82 milyon, Türkiyəyə 63,6 milyon, Gürcüstana 37 milyon, İsveçrəyə 20,6 milyon və İrana 8,5 milyon ABŞ dolları dəyərində qeyri-neft sektoruna aid mal ixrac olunub.

2019-cu ilin yanvar-fevral ayları ərzində ixrac edilən qeyri-neft sektoruna aid malların siyahısında elektrik enerjisi birinci olub: iki ayda 30,5 milyon ABŞ dollar dəyərində elektrik enerjisi satılıb. Bu siyahıda mahlıc (25,9 milyon ABŞ dolları) ikinci, qabığı təmizlənmiş meşə fındığı isə (24,7 milyon ABŞ dolları) üçüncü yerdədır. Bu dövrdə xaricə ixrac edilən məhsullar sırasında qızılın, kimya məhsullarının, pomidor və metanolun da həcmi artıb. İlin ilk iki ayında Azərbaycanın ixracı 3,2 milyard ABŞ dolları, o cümlədən qeyri-neft sektoru üzrə ixrac 282 milyon ABŞ dolları təşkil edib.