22 Noyabr 2026
SOSİAL-İQTİSADİ ONLAYN QƏZET
Hacıqabulda istehsal olunan istilik izolyasiya lövhələri xarici bazarlara çıxarılır

Hacıqabulda istehsal olunan istilik izolyasiya lövhələri xarici bazarlara çıxarılır MƏQALƏ

İqtisadiyyat Nazirliyinin tabeliyindəki İqtisadi Zonaların İnkişafı Agentliyinin idarəçiliyində olan Hacıqabul Sənaye Parkının rezidenti “Penoplex Prikavkazye” istilik izolyasiya lövhələrinin istehsalını davam etdirir. 2023-cü ilin oktyabrında fəaliyyətə başlamış müəssisənin məhsullarının 60 faizi daxili bazara, 40 faizi isə ixraca yönəldilir.

Şirkətin texniki direktoru Teymur Mahmudovun sözlərinə görə, Rusiya kapitallı müəssisənin investisiya dəyəri 18,4 milyon manat, illik istehsal gücü isə təxminən 300 min kubmetrdir. Hacıqabul Sənaye Parkının 6,7 hektar ərazisində yerləşən müəssisə istilik izolyasiyasında istifadə olunan XPS tipli ekstruziyalı köpük polistirol lövhələr istehsal edir. İki santimetrdən on santimetrədək müxtəlif qalınlıqlarda istehsal olunan bu materiallar binaların damları, fasadları və təməllərinin izolyasiyasında tətbiq edilir.

T.Mahmudov bildirib ki, müəssisənin məhsullarına əsas tələbat tikinti sektorundan gəlir. Lövhələr xüsusilə Qarabağda aparılan yenidənqurma və bərpa işlərində istifadə olunur. Bununla yanaşı, şirkət məhsullarını pərakəndə satış kanalları vasitəsilə də istehlakçılara təqdim edir.

İxrac coğrafiyası genişlənir

Müəssisənin əsas ixrac bazarı Gürcüstandır. Şirkətin bu ölkədə satış tərəfdaşları fəaliyyət göstərir.

T.Mahmudovun sözlərinə görə, gələcəkdə ixrac coğrafiyasının genişləndirilməsi nəzərdən keçirilir. Belə ki, Zəngəzur dəhlizinin (TRIPP – red.) açılması Türkiyə bazarına çıxış imkanlarını artıra bilər. Türkiyənin şərq bölgələri, eləcə də Rusiyanın cənub əraziləri potensial bazarlar kimi qiymətləndirilir.

İstilik izolyasiyası sahəsində maarifləndirmə və tədqiqatlar

T.Mahmudovun fikrincə, Azərbaycanda istilik izolyasiya materiallarından istifadə mədəniyyətinin inkişafı həmin məhsullara tələbatın artmasına şərait yarada bilər. Bu istiqamətdə şirkət yalnız istehsalla kifayətlənmir, eyni zamanda elmi-tədqiqat işləri də aparır. Müəssisədə istilik izolyasiya materiallarının tətbiqi və qoruyucu konstruksiyaların xüsusiyyətlərinin öyrənilməsi istiqamətində sınaqlar keçirilir. Şirkət yaşayış evlərindən ibarət sınaq obyektlərində iki ildən artıqdır ki, tədqiqatlar aparır və öz metrologiya stansiyasından əldə olunan məlumatları araşdırır. Toplanan nəticələr təhlil edildikdən sonra onların dövlət layihə institutları və elmi müəssisələrlə bölüşdürülməsi nəzərdə tutulur. Məqsəd tikinti sektorunda istilik izolyasiyası üzrə biliklərin genişlənməsinə və müvafiq həllərin tətbiqinə töhfə verməkdir.

Logistika dəstəyi ixrac imkanlarını artıra bilər

Şirkət üçün əsas məsələlərdən biri xarici bazarlarda rəqabət qabiliyyətinin artırılmasıdır. Texniki direktor bildirib ki, “Penoplex” Gürcüstan bazarında yerli və Türkiyədən məhsul təklif edən şirkətlərlə rəqabət aparır. Onun sözlərinə görə, cari ilin sentyabrın 1-dən xaricə satılacaq qeyri-neft məhsulları üzrə logistika dəstəyinin göstərilməsi xərclərin azalmasına təsir göstərə və bu da məhsulun son qiymətinə müsbət təsir göstərə bilər. Sözsüz ki, bu da şirkətin istehsal etdiyi məhsulların xarici bazarlarda rəqabət imkanlarını genişləndirə bilər.

Qeyd edək ki, müəssisənin fəaliyyəti Hacıqabulda sənaye istehsalının inkişafına və məşğulluğun artırılmasına da töhfə verir. Zavodda 100-dən çox şəxsin məşğulluğu təmin edilib.

Faiq KƏRİMOĞLU

VergiFiziki şəxs öz adına olan VÖEN-i necə ləğv edə bilər? VergiXarici filmlərin yerli kinoteatrlarda nümayişindən əldə edilən gəlirlər hansı formada vergiyə cəlb olunur? VergiFiziki şəxs vergi ödəyicisi olmasını necə dəqiqləşdirə bilər? VergiFiziki şəxs vergi borcunun olub-olmamasını necə öyrənə bilər? VergiŞəxsi istifadə üçün silinən mallara görə vergi öhdəlikləri necə hesablanır? Vergi“YouTube”dan gəlir əldə edən şəxsin hansı vergi öhdəliyi və güzəştləri var? VergiƏmlakın əvvəlki sahibinin ödənilməmiş vergi borcu yeni mülkiyyətçiyə aid edilə bilərmi? Vergiİnvestorun xarici şirkətdən əldə etdiyi dividend gəliri hansı qaydada vergiyə cəlb olunur? VergiÖzəl sektorda çalışan işçilərin gəlirlərinin vergiyə cəlb olunması VergiMəişət mallarının satışı ilə məşğul olan fərdi sahibkarın dövriyyəsi artdıqda ƏDV qeydiyyatına alınmalıdırmı?