Azərbaycanda beynəlxalq sərgilər mövsümünə may ayında start veriləcək. İl ərzində ümumilikdə 13 tədbirin keçirilməsi nəzərdə tutulub.

“Caspian Event Organisers”in məlumatına görə, sərgi təqvimində yer alan yaz mövsümü üzrə bir sıra sərgilər üçün 2025-ci il əlamətdar olacaq. Belə ki, regionun ən böyük qida sənayesi üzrə ixtisaslaşmış sərgisi olan “InterFood Azerbaijan”ın və ölkənin enerji sahəsində mühüm hadisəsi olan “Bakı Enerji Həftəsi”nin 30 illik yubileyi qeyd ediləcək.

Müvafiq dövlət qurumlarının dəstəyi ilə keçiriləcək sərgilər aşağıdakılardır:

“Caspian Agro” və “InterFood Azerbaijan”

2025-ci ilin yaz sərgi mövsümünə 13-16 may tarixlərində regionun ən böyük beynəlxalq kənd təsərrüfatı və qida sənayesi tədbirləri olan 18-ci Azərbaycan Beynəlxalq Kənd Təsərrüfatı “Caspian Agro” və 30-cu Yubiley Azərbaycan Beynəlxalq Qida Sənayesi “InterFood Azerbaijan” sərgiləri ilə start veriləcək.

Sərgi günlərində Beynəlxalq Aqrar İnnovasiyalar Forumu keçiriləcək. Forumda kənd təsərrüfatı sahəsinə aid vacib mövzulara toxunulacaq.

“Caspian Agro” sərgisi 30-cu Yubiley Azərbaycan Beynəlxalq Qida Sənayesi “InterFood Azerbaijan” ilə eyni məkanda – Bakı Ekspo Mərkəzində keçiriləcək.

Sərgilər çərçivəsində təşkil ediləcək ənənəvi ikitərəfli işgüzar görüşlər (B2B və B2G) zamanı yerli və xarici şirkətlərin nümayəndələri üzbəüz formatda əməkdaşlıq və gələcək tərəfdaşlıq yollarını müzakirə edə biləcəklər.

“Baku Energy Week” (Bakı Enerji Həftəsi)

Yaz mövsümü 2-4 iyun tarixlərində Bakı Ekspo Mərkəzində keçiriləcək, enerji sahəsinin ən böyük hadisələrindən olan 30-cu Yubiley “Baku Energy Week” ilə davam edəcək.

Bakı Enerji Həftəsi regionun aparıcı liderlərinin və dünya miqyasında enerji sektorunun ən önəmli iştirakçılarının bir araya gələrək mühüm məsələləri müzakirə etdiyi və əhəmiyyətli qərarlar verdiyi effektiv bir platformadır.

Ənənəvi olaraq, Bakı Enerji Həftəsi çərçivəsində ikitərəfli işgüzar görüşlər keçiriləcək. Burada yerli və xarici şirkətlərin nümayəndələri üzbəüz formatda əməkdaşlıq və gələcək tərəfdaşlıq yollarını müzakirə edə biləcəklər.

“Baku Energy Forum”

3 və 4 iyun tarixlərində Bakı Konqres Mərkəzində “Baku Energy Week”in əsas hadisəsi olan “Baku Energy Forum” (Bakı Enerji Forumu) baş tutacaq. Burada enerji sənayesinin gələcək gündəliyi formalaşır, strateji təşəbbüslər və inkişafın əsas tendensiyaları müzakirə edilir. Bu il Forumun əsas mövzuları dayanıqlı enerji sənayesinin inkişafı, enerji sektorunun rəqəmsallaşdırılması, yaşıl enerji layihələrinin sürətləndirilməsi və dekarbonizasiya üçün innovativ həllərin araşdırılmasıdır. Bu müzakirələr qlobal enerji sektorunun transformasiyasına istiqamət verərək onun gələcəyini müəyyənləşdirməkdə mühüm rol oynayacaq.

“TransLogistica Caspian” sərgisi

2025-ci ilin 2-4 iyun tarixlərində Bakı Ekspo Mərkəzində keçiriləcək 22-ci Xəzər Beynəlxalq Nəqliyyat, Tranzit və Logistika Sərgisi “TransLogistica Caspian” nəqliyyat sahəsində müasir həllərin müzakirəsi və təqdimatı üçün önəmli bir platforma təqdim edir. Bu tədbir logistika və nəqliyyat sahəsinin ən mühüm sərgilərindən biri kimi tanınır və Avrasiya regionunun peşəkarlarını bir araya gətirir.

Qlobal logistik marşrutların transformasiyası və artan rəqabət şəraitində “TransLogistica Caspian” sərgisində iştirak sektorda lider olmaq istəyən şirkətlər üçün vacib bir addım halına gəlir. Bu sərgi beynəlxalq nəqliyyat dəhlizlərinə inteqrasiya üçün yeni imkanlar açır, əməkdaşlıq üçün platforma təqdim edir və Orta Dəhliz, TRACECA və "Bir kəmər, bir yol" təşəbbüsləri çərçivəsində biznesin inkişafına unikal şərait yaradır.