Dünya İqtisadi Forumu (DİF) Azərbaycanda rəqəmsal iqtisadiyyatın inkişafı üzrə tədbirlərin həyata keçirilməsinə dair “Neftdən alqoritmlərə doğru: Azərbaycanın rəqəmsal mükəmməlliyə aparan yolu” adlı məqalə dərc edib.

Yazının əsas məqamları:

- Avtomatlaşdırma və rəqəmsallaşma bir çox sahələrdə əsas rol oynayır. “International Data Corporation”un hesabatına görə, 2027-ci ildə rəqəmsal transformasiyaya qlobal xərclər 3,9 trilyon ABŞ dollarına çatacaq.

- DİF-in hesablamalarına görə, 2025-ci ilədək rəqəmsallaşma qlobal ÜDM-ə 45 trilyon dollar əlavə edə bilər. Daha böyük əlaqələndirməyə doğru bu cür koordinasiyalı impuls qlobal ÜDM-in gücləndirilməsi üçün böyük potensiala malikdir.

- DİF-in Dördüncü Sənaye İnqilabı Şəbəkə Mərkəzinin (C4IR Azerbaijan) də yerləşdiyi Azərbaycan İqtisadiyyat Nazirliyinin Dördüncü Sənaye İnqilabının Təhlili və Koordinasiya Mərkəzi ölkənin 2024-2030-cu illər üçün rəqəmsal iqtisadiyyat strategiyasının təkmilləşdirilməsi üzərində işləyir.

- Strategiya Azərbaycan iqtisadiyyatının kompleks transformasiyasına yönəlib. Onun məqsədi birgə və çevik qərarların qəbulu, biznes, vətəndaş cəmiyyəti və dövlət qurumları arasında əlaqələrin gücləndirilməsi yolu ilə konkret sahələrdə problemləri həll etməkdir. Strategiya rəqəmsal iqtisadiyyata keçid kontekstində Azərbaycanın regional və beynəlxalq mövqelərinin gücləndirilməsinə yönəlib.

- Strategiya rəqəmsallaşma və yeni bizneslərin yaranması üçün əlverişli mühit yaratmağa kömək edəcək. Doqquz qabaqcıl layihə və 60-dan çox təşəbbüslə bu strategiya Azərbaycan iqtisadiyyatının rəqəmsal transformasiyasının inkişafında əsas rol oynayacaq.

- DİF və “C4IR Azerbaijan” Digital FDI layihəsini (Azərbaycanın rəqəmsal iqtisadiyyatına investisiya - IDEA) birgə həyata keçirir. Təşəbbüsün birinci mərhələsi uğurla başa çatıb və layihənin ikinci mərhələsində prioritet olacaq üç sahə artıq müəyyən edilib.

- Təşəbbüs biznesləri rəqəmsal landşaftda inkişaf etmək üçün lazım olan alətlər və biliklərlə təchiz edəcək, Azərbaycanın inkişaf etməkdə olan iqtisadiyyatında innovasiyaları, inkişafı və rəqabət qabiliyyətini təşviq edəcək.

- İkinci mərhələnin əsas komponentlərindən biri “İnvestisiya kalkulyatoru” olacaq ki, bu da şirkətlərə potensial investisiya gəlirlərinin dəqiq proqnozları əsasında əsaslandırılmış qərarlar qəbul etməyə imkan verəcək, strateji planlaşdırmanı, risklərin qiymətləndirilməsini və resursların bölüşdürülməsini asanlaşdıracaq.

- Bundan əlavə, “İnvestisiya kalkulyatoru” investisiya prosesini sadələşdirməyə, şəffaflığı artırmağa və investorların inamını gücləndirməyə kömək edəcək. Ümumiyyətlə, bu, istifadəçilərə investisiya strategiyalarını optimallaşdırmaq və maliyyə nəticələrini maksimum dərəcədə artırmaq imkanı verəcək.

- Yekun olaraq layihə yerli şirkətlərə və startaplara xarici investorları effektiv şəkildə cəlb etmək imkanı yaratmaqla yanaşı, Azərbaycanın birbaşa xarici investisiyalar üçün cəlbediciliyini artırmaq məqsədi daşıyır.