Azərbaycanın ilk boya fabriklərindən biri olan ”Bilfa boyaları” MMC məhsul ixrac etdiyi ölkələrin sayını artırmağı planlaşdırır. Bunu “Azərbaycan iqtisadiyyatı” Teleqram kanalına ”Bilfa boyaları” MMC-nin direktoru Sənan Gəray deyib.

Onun sözlərinə görə, şirkətin istehsal etdiyi boyalar, əsasən, daxili bazarda satılır. Hazırda bu məhsullar yalnız Gürcüstana ixrac edilir və il ərzində həmin ölkəyə təqribən 200 ton məhsul göndərilir: “Hazırda ixracın genişləndirilməsi üçün işlər aparılır. Bizim əsas üstünlük verdiyimiz qonşu dövlətlərin bazarlarıdır. 2024-cü ildə məhsul ixrac etdiyimiz ölkələrin sayını, heç olmasa, 3-ə çatdırmağı planlaşdırırıq”.

S.Gəray Sahibkarlığın İnkişafı Fondunun krediti hesabına yeni avadanlıqlar alaraq istehsallarını genişləndirdiklərini vurğulayıb.