İki əsas texnologiya - süni intellekt və blokçeyn Dördüncü Sənaye İnqilabının bir hissəsi kimi iqtisadi inkişafa əhəmiyyətli təsir göstərəcək.

Bu barədə “Azərbaycan iqtisadiyyatı” Teleqram kanalına innovasiyalar və davamlı inkişaf sahəsində qlobal lider Rika Nakazava bildirib.

"Bəşəriyyət əməliyyat texnologiyalarının informasiya texnologiyaları ilə birləşməsini görəcək. Nəticədə dünyanın bir çox cəhətdən inkişafda olan bəzi ölkələri sıçrayış edəcək, çünki rəqəmsal cihazlar, maşınlar və avadanlıqlara çıxış əldə edə biləcəklər",- ekspert deyib.

R.Nakazavanın sözlərinə görə, indi özəl 5G şəbəkələri sənaye və bütün dünyada getdikcə daha çox yayıldığı üçün insanlar bəzi rəqəmsal texnologiyalara daxil olma imkanı əldə edəcəklər: "Süni intellekt bizə böyük həcmdə məlumatları daha yaxşı idarə etməyə və bu məlumat komponentlərinin bir-birinə necə bağlı olduğunu başa düşməyə kömək edəcək. Beləliklə, bu məlumatları idarə etmək bacarığı və proqnozlaşdırıcı analitika və ya rəqəmsal əkizlər yaratmaq qabiliyyəti ilə təşkilatlar risklərə daha yaxşı cavab verə biləcəklər. Bundan əlavə, blokçeyn bütün təchizat zəncirini təkmilləşdirəcək və şəffaflığı təmin edəcək”.

Ekspert qeyd edib ki, süni intellekt biznes və müəssisələrin inkişafında mühüm rol oynayacaq.

"Biz bu gün bacarıqların inkişafı haqqında düşünməliyik, bu, istedadın intibahını yaratmağa kömək edəcək. Bu, süni intellektin iqtisadiyyatı yaxşılaşdırmaq üçün yaratdığı dəyəri optimallaşdırmaq imkanı yaradacaq",- R.Nakazava vurğulayıb.

Tamilla MƏMMƏDOVA