Misirin paytaxtı Qahirə şəhərində Azərbaycan və Misirin biznes dairələri arasında görüş keçirilib.

İxracın və İnvestisiyaların Təşviqi Agentliyindən (AZPROMO) “vergiler.az”a verilən məlumata görə, tədbirdə hər iki ölkədən sənaye, qida, əczaçılıq, bərpa olunan enerji, mühəndislik, tikinti və digər sahələrdə fəaliyyət göstərən şirkət nümayəndələri iştirak ediblər.

Tədbirdə Azərbaycan-Misir İşgüzar Şurasının sahibkarlar arasında investisiya sahəsində daha sıx əməkdaşlığın qurulmasında və qarşılıqlı ticarətin artırılmasında əhəmiyyətli rol oynayacağı vurğulanıb.

Azərbaycanlı iş adamları Misirdə fəaliyyət göstərmək üçün dəvət olunub.

Tədbir çərçivəsində AZPROMO və Misirin İnvestisiyalar və Azad Zonalar üzrə Baş Qurumu (GAFI) arasında investisiyaların təşviqi sahəsində 2023-2025-ci illəri əhatə edəcək İcra Proqramı üzrə Anlaşma Memorandumu imzalanıb.