İqtisadi Zonaların İnkişafı Agentliyinin (İZİA) təşkilatçılığı ilə bir qrup KİV nümayəndəsi Hacıqabul Sənaye Məhəlləsinin fəaliyyəti ilə tanış olub.

İZİA-dan “vergiler.az”a verilən məlumata görə, KİV nümayəndələri yeni fəaliyyətə başlamış “Provive” MMC-nin gübrə istehsalı müəssisəsində olublar. Diqqətə çatdırılıb ki, müəssisədə innovativ texnologiyaya əsaslanaraq “Black soldier fly” milçəyinin sürfələrindən istifadə olunmaqla qida tullantılarından zülal (heyvan mənşəli) və “Zoohumus” üzvi gübrəsi istehsal olunur. İnvestisiya həcmi 2,3 milyon manat olan müəssisədə 20-yə yaxın daimi iş yeri yaradılıb. Hazırda müəssisənin aylıq istehsal gücü 15 tondur və yaxın vaxtlarda bunun 30 tona çatdırılması planlaşdırılır.

Tikinti materialları üçün avadanlıqlar istehsal edən “Elberg” MMC-də KİV nümayəndələrinə məlumat verilib ki, müəssisəyə indiyədək 3,5 milyon manat investisiya yatırılıb və 40 nəfərdən çox iş yeri yaradılıb. İqtisadiyyat Nazirliyi tərəfindən investisiya təşviqi sənədi verilmiş müəssisədə Türkiyə, Yaponiya və Finlandiya texnologiyalarından istifadə edilir. İstehsal olunan məhsullar daxili bazarın təlabatının ödənilməsinə yönəldilib.

Sənaye Məhəlləsində fəaliyyət göstərən daha bir müəssisə plastik su qabları istehsal edən “Uysal Ambalaj” MMC-dir. İl ərzində 350 min ədəd plastik su qabı istehsal etmək gücündə olan müəssisənin qurulmasına 1,84 milyon manat investisiya yatırılıb, 10 daimi iş yeri yaradılıb.

Media mənsubları “Az Agromila” MMC-nin maye, toz, gel, yarpaq gübrələri istehsalı müəssisəsində də olublar. Məlumat verilib ki, illik istehsal gücü 6 min ton gübrə olan zavodun investisiya dəyəri 1,5 milyon manatdır. Müəssisədə 12 işçi çalışır.

Sənaye müəssisəsində plastik tara istehsalını həyata keçirən “Plasttech” MMC-nin qurduğu müəssisəyə 1,2 milyon manat investisiya yatırılıb və 5 iş yeri yaradılıb. Zavod ildə 600-900 ton plastik tara istehsal etmək gücündədir.

Media nümayəndələri Sənaye Məhəlləsinin Rusiya kapitallı rezidenti “Penoplex Prikavkazye” MMC-nin istilik izolyasiya lövhələri istehsal edəcək müəssisəsində aparılan tikinti işləri ilə də tanış olublar.
Qeyd edək ki, Hacıqabul Sənaye Məhəlləsində ümumi investisiya həcmi 51 milyon manatdan artıq olan 13 sahibkarlıq subyekti rezident kimi qeydiyyatdan keçib və bunlardan 8-i artıq fəaliyyət göstərir. Sənaye Məhəlləsinin rezidentləri minik avtomobilləri, müxtəlif növ və ölçüdə polad şuruplar, taxta məhsulları, plastik qablar və taralar, tikinti materialları, gübrə istehsalı və s. sahələr üzrə ixtisaslaşıb. Rezidentlər tərəfindən təxminən 44 milyon dəyərində məhsul istehsal edilib. İndiyədək Hacıqabul Sənaye Məhəlləsinə 25,3 milyon manat investisiya qoyulub, mövcud layihələr üzrə əlavə olaraq 25,8 milyon manatadək investisiyanın yatırılması, 400-ə yaxın iş yerinin yaradılması nəzərdə tutulur.