İqtisadiyyat Nazirliyi tərəfindən yaradılan Elektron Kredit Platforması üzərindən bu vaxtadək 907 milyon manat həcmində yeni biznes krediti sifarişi üzrə 3200-dən çox müraciət daxil olub.
Nazirliyin mətbuat xidmətindən AZƏRTAC-a bildirilib ki, 471 müraciət üzrə ümumi həcmi 145 milyon manat olan kreditlərin ayrılması barədə qərarlar qəbul edilib. Hazırda digər müraciətlərə baxılır və müəyyən olunmuş müddətdə nəticələr barədə sahibkarlara elektron platforma vasitəsilə məlumat verilir.
Biznesin dövlət zəmanətli krediti asan və şəffaf formada əldə etməsi üçün Elektron Kredit Platforması (“www.e-edf.gov.az”) sahibkarların kredit sifarişləri üçün əlverişli vasitəyə çevrilib.
Kredit-zəmanət mexanizminin tətbiqi pandemiyadan zərərçəkmiş sahələrdə iqtisadi fəallığın və məşğulluğun qorunub saxlanması, likvidliyin dəstəklənməsi baxımından xüsusilə əhəmiyyətlidir. Yeni biznes kreditlərinin Elektron Kredit Platforması vasitəsilə verilməsi isə sahibkarlara biznes kreditləri üçün onlayn rejimdə müraciət, müvəkkil kredit təşkilatları və İqtisadiyyat Nazirliyində müraciətlərə eyni vaxtda baxılması və statusunun real vaxt rejimində izlənməsi, həmçinin 3 kredit təşkilatına eyni vaxtda müraciət imkanının yaradılması və sair kimi üstünlüklər yaradır. Beləliklə, sahibkarların kreditlərə çıxış imkanları genişlənir, sərf olunan vaxta və xərclərə qənaət edilir.