Azərbaycan və Dağıstanın turoperatorlar assosiasiyaları arasında turizm sahəsində qarşılıqlı əməkdaşlıq haqqında razılıq əldə olunub.
“vergiler.az” Dağıstanın İxraca Dəstək Mərkəzinə istinadən xəbər verir ki, razılıq Dağıstan sahibkarlarının Bakıya təşkil olunan biznes-missiyası çərçivəsində əldə olunub. Dağıstan nümayəndə heyətinə Mərkəzin direktoru Ruslan Abasquliyev rəhbərlik edir.
Görüş çərçivəsində Dağıstanın və Azərbaycanın turoperatorları tərəfindən hər iki respublikanın turizm potensialı təqdim olunub, birgə tur marşrutlarının yaradılması müzakirə edilib. Azərbaycanın turoperatorlarının Dağıstana səfərinə dair razılıq əldə olunub.
Digər razılaşma isə Dağıstanın tikinti sektorundan olan malların Bakıdakı sərgi salonu vasitəsilə təşviqinə aiddir.