Təkcə Azərbaycanda deyil, bütün dünyada ən çox vergidən yayınma halları ticarət şəbəkələri, ictimai iaşə, tikinti kimi sahələrdə qeydə alınır.
Vergilər nazirinin müavini Sahib Ələkbərov Real TV-yə müsahibəsində qeyd edib ki, "kölgə iqtisadiyyatı"nın miqyası kiçildikcə vergidən yayınma halları da azalır: "Biz işimizi elə səviyyədə qurmağa çalışırıq ki, vergidən yayınmanın qarşısını maksimum dərəcədə ala bilək".
Sahib Ələkbərovun sözlərinə görə, şəffalıq ölkə iqtisadiyyatının bütün sahələrini əhatə etməkdədir və bu, xüsusilə vergi üçün böyük əhəmiyyət daşıyır: "Çünki şəffaflığı təmin etmədən vergidən yayınmanın qarşısını almaq, digər məsələlərlə məşğul olmaq çətindir. Şəffaflıq bütün sahələrə, birinci növbədə uçot və qeydiyyat məsələlərinə sirayət etməlidir. Dövlət öz tərəfindən sahibkarlara normal biznes mühiti yaratmağa çalışır. Bu gün Azərbaycanda qeydiyyatla bağlı elə bir şərait yaradılıb ki, təkcə fiziki şəxslər yox, hüquqi şəxslər belə, təxminən, 20 dəqiqə ərzində qeydiyyatdan keçə bilirlər. Digər tərəfdən, şəffaflıq vergi uçotunu əhatə etməlidir. Yəni vergilərin hesablanması üçün istehsalın həcmini, ticarətin dövriyyəsini dəqiq bilmək lazımdır. Bu sahədə müəyyən problemlər var, onların qarşısını almaq üçün tədbirləri davam etdiririk".