"MBA Group" konsaltinq şirkətinin rəhbəri Nüsrət İbrahimov digər seqmentlərdə qiymətlərin azaldığını bildirib. Onun sözlərinə görə, paytaxtın təkrar mənzil bazarında ay ərzində qiymətlərdə 0,41 faiz artım olub. Ötən ilin eyni dövrü ilə müqayisədə isə 0,70 faiz azalma olub.
İlkin mənzil bazarında mayda şəhər üzrə orta qiymətlər 7,22 faiz artıb. Ötən ilin may ayı ilə müqayisədə isə 9,11 faiz artıb. Torpaq bazarında həm ay ərzində, həm də il ərzində artım müşahidə edilib. Ötən ilin eyni dövrü ilə müqayisədə qiymətlər 19,3 faiz qalxıb.
Kommersiya obyektləri bazarında isə azalma müşahidə edilib. Bu seqmentdə ötən ilin may ayı ilə müqayisədə qiymətlərdə 3,1 faiz artım qeydə alınsa da, 1 ay əvvəlki qiymətlərə nisbətən 7,65 faiz azalma olub. Obyektlərin icarəsi bazarında ötən ilin eyni dövrü ilə müqayisədə 2,48 faiz bahalaşma müşahidə edilib.
Mənzillərin kirayəsi bazarına gəlincə, birotaqlı mənzillərə tələbatın artdığına görə may ayında həmin mənzillərin kirayə qiymətləri artıb. Ümumilikdə isə bu seqmentdə qiymətlər 2,15 faiz azalıb. Bu, daha çox çoxotaqlı mənzillərin kirayə qiymətlərində müşahidə edilib. Ötən ilin eyni dövrü ilə müqayisədə isə 2,98 faiz artım olub.
Bütün bunlar onu deməyə əsas verir ki, bu ayda qiymətlərdə bir qədər stabilləşmə qeydə alınır. Yəqin ki, biz əmlak bazarının bütün seqmentləri üzrə qiymətlərin azalmasının şahidi olacağıq.
Fərqanə ALLAHVERDİQIZI