Koronavirus (COVID-19) pandemiyasından zərərçəkmiş sahibkarlara dövlət maliyyə dəstəyinin göstərilməsi davam etdirilir.
İqtisadiyyat Nazirliyindən bildirilir ki, indiyədək nazirliyə 124 min 999 vergi ödəyicisi müraciət edib, bunlardan 26 min 495-i muzdlu işçilərin əməkhaqqının müəyyən hissəsinin ödənilməsi üçün müraciət edən vergi ödəyicisi və 98 min 504-ü isə maliyyə dəstəyi almaq üçün müraciət ünvanlayan fərdi (mikro) sahibkardır.
Muzdlu işçilərin əməkhaqqının müəyyən hissəsinin ödənilməsi çərçivəsində 252 min 65 işçini əhatə edən 26 min 495 sahibkarın müraciəti araşdırılaraq təsdiqlənib və ayrılacaq maliyyə vəsaitinin bank hesablarına köçürülməsi üçün Maliyyə Nazirliyinə təqdim edilib. Digər vergiödəyiciləri üzrə araşdırmalar davam edir. İndiyədək təsdiq edilmiş müraciətlər üzrə maliyyə dəstəyinin həcmi 90 milyon 294 min manat, o cümlədən 1-ci mərhələ üzrə ödənilməsi nəzərdə tutulan vəsaitin həcmi 45 milyon 147 min manat təşkil edir. Mayın 7-nə Maliyyə Nazirliyinin Dövlət Xəzinədarlıq Agentliyi 21 min 564 vergiödəyicisinə 190 min 156 nəfər muzdlu işçinin əməkhaqqı üzrə 42 milyon 956 min manat vəsaitin köçürülməsini təmin edib.
Fərdi (mikro) sahibkarlara maliyyə dəstəyinin göstərilməsi proqramı çərçivəsində 89 min 742 sahibkarın müraciəti araşdırılaraq təsdiqlənib və maliyyə dəstəyinin bank hesablarına köçürülməsi üçün Maliyyə Nazirliyinə təqdim edilib. Təsdiq edilmiş müraciətlər üzrə maliyyə dəstəyinin həcmi 54 milyon 285 min manat təşkil edir. Maliyyə Nazirliyinin Dövlət Xəzinədarlıq Agentliyi tərəfindən 52 milyon 156 min manat vəsaitin 85 min 814 fərdi (mikro) sahibkarın bank hesablarına köçürülməsi təmin olunub.