İşsizliyə görə müavinət kimlərə şamil edilir?

Qərara əsasən, müavinətin məbləği minimum yaşayış məbləği həcmində -190 manat müəyyən edilib. Aprel və may aylarında həmin məbləğ işsiz vətəndaşlara ödəniləcək. Artıq işsiz statusu alaraq birdəfəlik müavinəti əldə etmək üçün işsiz şəxslər e-sosial.az saytında qeydiyyatdan keçməyə başlayıb.

Bəs işsiz şəxs anlayışı kimlərə aiddir? Mövzunu hüquqşünas Şəhriyar Həbilov şərh edir.

İşi və qazancı olmayan, işə başlamağa hazır olub, müvafiq icra hakimiyyəti orqanının müəyyən etdiyi orqanda (qurumda) işsiz kimi qeydiyyata alınan, əmək qabiliyyətli yaşda olan əmək qabiliyyətli şəxs işsiz şəxs sayılır. Ölkə üzrə əmək qabiliyyətli yaş 15 yaş hesab edilir və səlahiyyətli qurum Dövlət Məşğulluq Xidmətidir.

Məşğul şəxslərə isə aşağıda göstərilən şəxslər aiddir:

• əmək müqaviləsi ilə işləyənlər;

• mülki-hüquqi (xidməti) müqavilə ilə ödənişli olaraq iş və ya xidmət göstərənlər;

• sahibkarlar;

• kənd təsərrüfatına yararlı torpaq payının mülkiyyətçiləri və ailə kəndli təsərrüfatının üzvləri;

• haqqı ödənilən vəzifəyə seçilən və ya təyin edilənlər (deputat, bələdiyyə sədri və s);

• Silahlı Qüvvələrdə xidmət edənlər;

• ödənişli fəaliyyətlə məşğul olan ali və orta ixtisas təhsili müəssisələrində əyani təhsil alanlar;

• qanuni əsaslarla bu ölkədə əmək fəaliyyəti ilə məşğul olan əcnəbi və vətəndaşlığı olmayanlar;

• ölkə ərazisindən kənarda əmək fəaliyyəti ilə məşğul olan vətəndaşlar.

Yaşa görə pensiya və ya müavinət alan şəxslər də dolayısı ilə işsiz kimi qeydiyyata alınmırlar. Nazirlər Kabineti tərəfindən təsdiq edilmiş 7 aprel 2020-ci il tarixli "Koronavirus (COVID-19) pandemiyası dövründə xüsusi karantin rejiminin tətbiq olunması ilə əlaqədar işsiz kimi qeydiyyatda olan şəxslərə birdəfəlik ödəmənin verilməsi şərtləri və qaydası"na görə, aşağıdakı şəxslərə 190 manatlıq müavinət verilmir:

• ünvanlı dövlət sosial yardımı alan ailələrin üzvlərinə;

• əmək pensiyaçılarına;

• aylıq müavinət alanlara;

• aylıq təqaüd alanlara;

• özünüməşğulluğun təşkili proqramı çərçivəsində əmlak verilmiş şəxslərə;

• işsizlikdən sığorta ödənişi alanlara;

• peşə hazırlığına görə təqaüd alanlara;

• 2020-ci ildə kənd təsərrüfatı üzrə subsidiya almış şəxslərə;

• əri və ya arvadı sahibkar olanlara (aktiv VÖEN-i olan) və ya aktiv əmək müqaviləsi bildirişi olanlara;

• əri və ya arvadı göstərilən bu ödənişlərdən birini alan şəxslərə.

Birdəfəlik ödəmə yalnız ailə üzvlərindən (ər və ya arvad) birinə ödənilir. İkinci ay üçün ödəmə təkrar yoxlama aparılmaqla status təsdiqləndikdən və ilk ödəmədən 30 gün keçdikdən sonra aparılacaq.

Fərqanə ALLAHVERDİQIZI