Kiçik və Orta Biznesin İnkişafı Agentliyinin (KOBİA) nümayəndələri Böyük Britaniya və Şimali İrlandiya Birləşmiş Krallığına səfər çəçivəsində Londonda Kiçik Biznes Federasiyasında olublar. KOBİA-dan bildirilib ki, agentliyin idarə heyətinin sədri Orxan Məmmədov və Kiçik Biznes Federasiyasının Avropa İttifaqı və beynəlxalq əlaqələr idarəsinin direktor müavini Ceyms Sibli arasında keçirilmiş görüşdə Kiçik və Orta Biznesin İnkişafı Agentliyinin fəaliyyəti, xarici ölkələrin, o cümlədən Böyük Britaniyanın müvafiq qurumları ilə əməkdaşlığı barədə məlumat verilib, federasiya ilə əməkdaşlığa, qurumun nümayəndələrinin ölkəmizə səfərinin təşkilinə, startaplara və KOB-lara xidmətlərin göstərilməsi sahəsində təcrübə mübadiləsinə dair fikir mübadiləsi aparılıb.
Avropa Yenidənqurma və İnkişaf Bankının (EBRD) Direktorlar Şurasının üzvü Taşkın Temizlə görüşdə bankın 2019-2024-cü illər üzrə strategiyası çərçivəsində KOB-ların dəstəklənməsi istiqamətində, eləcə də dövlət-özəl sektor tərəfdaşlığı sahəsində əməkdaşlığa, EBRD-nin Bakı ofisi ilə birgə KOB-ların iştirakı ilə konfransın təşkili üzrə müzakirələr olub.
London Ticarət və Sənaye Palatasının baş icraçı direktorunun müavini Peter Bişopla görüşdə isə KOBİA-nın və palatanın fəaliyyəti, KOB-lara göstərilən xidmətlər barədə qarşılıqlı məlumat verilib, Azərbaycan şirkətlərinin dünyanın ən böyük biznesə dəstək şəbəkələrindən olan Avropa Sahibkarlar Şəbəkəsinə (Enterprise Europe Network) qoşulması imkanlarına, KOB-lara xidmətlərin göstərilməsi, bazarlara çıxış sahələrində təcrübə mübadiləsinə, eləcə də ixrac sahəsində KOB-ların bilik və bacarıqlarının artırılması barədə müzakirələr aparılıb.