"Netflix" şirkəti gəlirlərini ofşorlara köçürməkdə ittiham edilib

2020.01.21 18:49 (UTC+04:00)

Böyük Britaniyanın "Tax Watch" analitik mərkəzinin nəşr etdirdiyi hesabatda film və serialların yayımı ilə məşğul olan "Netflix" xidmətinin vergidən yayındığı iddia edilib. Hesabata əsasən, şirkət vergidən yayınmaq üçün öz gəlirlərini offşor hesablara köçürür.

"Tax Watch" analitik mərkəzinin qiymətləndirməsində göstərilib ki, şirkət öz gəlirlərindən ABŞ sərhədlərindən kənara ümumilikdə 327 milyon dollardan 430 milyon dollara qədər vəsait çıxardıb. Mənfəətin yığılması onun əldə edildiyi ölkələrdə baş vermir. İstehlakçı ölkədən daxil olan vəsaitləri offşor şirkət tutur. Belə görünür ki, bundan sonra əsas şirkət korporasiyadaxili tranzaksiyalar vasitəsilə pulları vergi sığınacaqlarına ötürür.

Hesabatda qeyd edilmiş məsələlərdən biri də budur ki, Böyük Britaniya ərazisində "Netflix" şirkətinə yüksək keyfiyyətli layihələrin qarşılığı olaraq vergi güzəştləri edilir. Analitiklər vergi çıxılmalarının bu il on milyonlarla dollara çatacağını təxmin edirlər. "Netflix"in tətbiq etdiyi sxemə əsasən, şirkət xərcləmələri vergi güzəşti aldığı yerlərdə həyata keçirir, gəlirləri isə verginin az olduğu regionlara köçürür və beləliklə, hər iki sistemin ona yaratdığı üstünlüklərdən faydalanmış olur.

Hesabatla bağlı "Netflix"in cavabında isə bildirilib ki, şirkət öz işlərini apardığı hər bir ölkənin qanunlarına əməl edir.