COP29 çərçivəsində “Dayanıqlı gələcəyin gücləndirilməsi: maliyyə vasitəsilə yaşıl inkişafa təkan” mövzusunda tədbir keçirilib.
BMT-nin İnkişaf Proqramının Dayanıqlı Maliyyə Habının direktoru Tomas Belonun moderatorluğu ilə keçirilən tədbirdə COP29-un prezidenti, ekologiya və təbii sərvətlər naziri Muxtar Babayev və iqtisadiyyat nazirinin müavini Səməd Bəşirli, COP29-un baş danışıqçısı, xarici işlər nazirinin müavini Yalçın Rəfiyev, Beynəlxalq Enerji Agentliyinin icraçı direktoru Fatih Birol çıxış ediblər.
Bildirilib ki, tədbir iqlim dayanıqlığının artırılması məqsədilə innovativ maliyyələşdirmə həllərinin və problemlərin müəyyən edilməsi üçün səmərəli platformadır. Bu dialoq iqlim dəyişikliyi ilə mübarizədə əsas istiqamətlərin müəyyənləşdirilməsi, COP29 ərzində və ondan sonrakı dövrdə yeni tərəfdaşlıqların qurulması üçün effektiv olacaq.
İqtisadiyyat Nazirliyinin Dayanıqlı inkişaf və sosial siyasət şöbəsinin müdiri Hüseyn Hüseynov inkişaf etməkdə olan ölkələrdə iqlim fəaliyyətinə investisiya yatırmaq məqsədilə Azərbaycanın təşəbbüsü olan İqlim Maliyyəsi üzrə Fəaliyyət Fondu (İMFF) barədə təqdimat edib. Fondun kapitalının karbohidrogen ehtiyatlarına sahib olan ölkələrin, eləcə də şirkətlərin könüllü ianələri sayəsində formalaşdırılması, 1 milyard ABŞ dolları həcmində ilkin vəsait toplandıqdan və 10 səhmdar ölkə donor olduqdan sonra fəaliyyətə başlaması nəzərdə tutulur.
Fondun işə başlamasının qlobal yaşıl keçid üçün tələb olunan investisiyaların səfərbər edilməsi istiqamətində mühüm addım olduğu vurğulanıb. Əsas missiya sadəcə yaşıl və təmiz keçidi maliyyələşdirmək deyil, həm də iqtisadiyyatları yenidən formalaşdırmaqdır.
Tədbirdə bir sıra ölkələrin və beynəlxalq təşkilatların rəhbər şəxsləri iqlim fəaliyyəti və yaşıl inkşaf tədbirləri barədə təcrübələri bölüşüblər, innovativ maliyyənin iqlimə davamlı iqtisadi artıma təsiri haqqında fikir mübadiləsi aparıblar.