2025-ci ildə Xəzər dənizinin dibi ilə fiber-optik rabitə xəttinin çəkilməsi layihəsi başa çatdırılacaq. Bu barədə Qazaxıstan Prezidenti Kasım-Jomart Tokayev xalqa müraciətində məlumat verib. “Bu, beynəlxalq dəhlizlərə və transsərhəd məlumat axınlarına qoşulacaq rəqəmsal infrastrukturun yaradılması baxımından ölkəmiz üçün son dərəcə vacibdir”, -deyə o bildirib.
Prezident telekommunikasiya şəbəkələrinin, məlumat mərkəzlərinin fəal inkişafının davam etdirilməsinin, qlobal kibertəhlükəsizlik standartlarının tətbiqinin, mütəxəssislərin səriştəsinin artırılmasının zəruriliyini qeyd edib.
2023-cü ildə telekommunikasiya operatorları “AzerTelecom” və “Kazaxtelecom” arasında Azərbaycan-Qazaxıstan marşrutu üzrə Xəzər dənizinin dibi ilə Trans-Xəzər fiber-optik rabitə xəttinin (FOCL) tikintisi və istismarı üzrə birgə müəssisənin yaradılması haqqında Saziş imzalanıb.
Bu rabitə xətti Avropa ilə Asiya arasında yeni rəqəmsal telekommunikasiya dəhlizinin yaradılmasını nəzərdə tutan irimiqyaslı “Digital Silk Way” layihəsinin bir hissəsi olacaq.
Sualtı xəttin əsas marşrutu Qazaxıstanın Aktau limanından Azərbaycanın Siyəzən şəhərinə qədər uzanacaq və onun uzunluğu 340 kilometrdən artıq olacaq. Bununla yanaşı, Qazaxıstanın Kurık limanından Bakının yaxınlığındakı Buzovna kəndinə uzunluğu təxminən 330 kilometr olan ehtiyat kanal çəkiləcək.
AZƏRTAC