“Məşğulluq haqqında” Azərbaycan Respublikası Qanununun 18-ci maddəsinə və Nazirlər Kabinetinin 16.09.2019-cu il tarixli 411 saylı qərarına əsasən, yeni iş yeri yarandığı və ya iş yeri boşaldığı gündən ən geci 5 iş günü müddətində, əməkhaqqı göstərilməklə, bu barədə məşğulluq altsistemində vakansiya bankına məlumat daxil edilməlidir.
Lakin aşağıdakı hallarda yeni ştat yaradılarkən və ya boş ştat qalan zaman həmin ştatlar barədə məşğulluq altsistemində vakansiya bankına məlumatların daxil edilməsi mütləq deyil:
1-ci hal: Müəssisəyə qanuni təmsilçi seçildikdə (direktor, baş direktor) – qanuni təmsilçi təsisçinin (təsisçilərin) qərarına əsasən seçilir. Bu da o deməkdir ki, müəssisə rəhbərinin kimliyi öncədən müəyyən edilmiş olur. Ona görə də ƏMAS-da müəssisə rəhbərinin əmək müqaviləsi bildirişi qeydiyyata alınarkən bu barədə məlumatın vakansiya bankına göndərilməsinə ehtiyac yoxdur.
2-ci hal: Vəzifə dəyişikliyi - əgər müəssisədə işçilərin vəzifələri dəyişdirilərsə, bu zaman yaranmış boş ştat haqqında məlumatın vakansiya bankına yerləşdirilməsinə ehtiyac yoxdur.
Qeyd edək ki, yuxarıda qeyd olunan iki hal istisna olmaqla, yeni iş yeri yarandığı və ya iş yeri boşaldığı gündən ən geci 5 iş günü müddətində məlumat vakansiya bankına daxil edilmədikdə, İnzibati Xətalar Məcəlləsinin 540-cı maddəsinin 2-ci hissəsinə əsasən, işəgötürənin 500 manatdan 1000 manatadək cərimə olunması riski yaranır.