Beynəlxalq Valyuta Fondunun direktoru Kristin Laqard və Avropa Mərkəzi Bankının rəhbəri Mario Draqhi ABŞ rəhbərliyinin vergi siyasəti nəticəsində dünyada artan ticarət gərginliyi ilə bağlı öz narahatlıqlarını bildiriblər.
Almaniyanın Frankfurt şəhərində təşkil edilmiş Mərkəzi, Şərqi və Cənub-Şərqi Avropa ölkələrinin toplaşdıqları beynəlxalq konfransda ABŞ ilə Çin arasındakı ticarət gərginliklərinin və ABŞ-ın Avropaya qarşı hədələrinin bütün tərəflər üçün problemlər yarada biləcəyinə diqqət yönəldilib. K.Laqard konfransdakı çıxışında deyib: "Qlobal əməkdaşlıq və bir sıra ticarət həllərinin zəiflədiyi bir şəraitdə bir araya gəlmişik. Qlobal iqtisadi artıma son altı ildə təzyiq edilir və dünyanın ən böyük iki iqtisadiyyatı bir-birinə qarşı yeni ticarət əngəlləri yaratmaq hədələri ilə çıxış edirlər. Bu proses yeni bir mərhələnin başlanğıcı ola bilər və biz bunun mənfi təsirini görə bilərik".
M.Draqhi isə ABŞ-ın Avropadan idxal edilən avtomobillərə əlavə gömrük vergisi təhdidinin Çexiya, Slovakiya, Polşa, Rumıniya kimi Avropanın başlıca avtomobil istehsalçılarını pis vəziyyətə sala biləcəyini vurğulayıb.