Tütün məmulatlarına tətbiq edilən aksiz dərəcəsi artırılıb

2022.01.31 14:37 (UTC+04:00)

Dövlət Vergi Xidmətindən bildirilir ki, Vergi Məcəlləsinə edilmiş dəyişikliyə əsasən, 1 yanvar 2022-ci ildən respublikada istehsal olunan aşağıdakı tütün məmulatlarının 1.000 ədədinə tətbiq edilən aksizin dərəcəsi:

• tütündən hazırlanan siqaretlər və onun əvəzediciləri üzrə 35 manatdan 38,5 manata;

• qızdırılma nəticəsində istehlak edilən (buxar) tütün və tütün məhsulları üzrə 12,9 manatdan 14,0 manata qaldırılmışdır.

Respublikada istehsal olunan aksizli malların siyahısına aşağıdakı aksizli mallar əlavə edilmiş və...

- qəlyan üçün tütünlər və tütün əvəzləyiciləri, istehsal məqsədli tütünlər istisna olmaqla digər çəkməli tütünlər, “homogenləşdirilmiş” və ya “bərpa edilmiş” tütünlər, çeynənilən və ya buruna çəkilən tütünlər - hər kiloqramına 30,0 manat;

- birdəfəlik istifadə üçün elektron siqaret, qəlyan və onların əvəzediciləri - hər bir ədədinə 0,25 manat aksiz dərəcələri müəyyən olunmuşdur.

Dəyişiklik nədən irəli gəlir?

Beynəlxalq təşkilatların tövsiyələri nəzərə alınmaqla dövlət tərəfindən həyata keçirilən sosial-iqtisadi siyasət çərçivəsində aksiz dərəcələrinin mərhələli şəkildə artırılması və optimallaşdırılması nəzərdə tutulur. Ümumdünya Səhiyyə Təşkilatının tütün məhsullarına tətbiq edilən aksiz dərəcələri barədə dərc edilmiş məlumatlarına əsasən, ümumilikdə dünya miqyasında siqaretə tətbiq edilən vergilər ortalama pərakəndə satış qiymətinin təxminən 50%-ni təşkil edir. Bununla yanaşı, aksiz dərəcələri beynəlxalq təşkilatların tövsiyələri, istehlakçıların alıcılıq qabiliyyətinə təsir imkanları nəzərə alınmaqla və sahibkarlıq subyektlərinin fəaliyyətinə mənfi təsir etməməsi diqqətdə saxlanılmaqla müəyyən edilmişdir.