Aşqabadda Beynəlxalq Neft və Qaz İnvestisiya Forumu keçirilir

2021.05.12 14:12 (UTC+04:00)

Aşqabadda Beynəlxalq Neft və Qaz İnvestisiya Forumu keçirilir. Neft və qaz sektoruna xarici investisiyaların cəlb edilməsi üzrə beynəlxalq forum Türkmənistanın müstəqilliyinin 30-cu ildönümünə təsadüf edir.

Forumda SOCAR-ın prezidenti Rövnəq Abdullayev və İqtisadiyyat nazirinin müavini Rövşən Nəcəf daxil olmaqla Azərbaycandan yüksək səviyyəli nümayəndə heyəti iştirak edir.

Həmçinin videoformatda keçirilən tədbirə 42 ölkədən 160-dan çox beynəlxalq neft-qaz və investisiya şirkətini təmsil edən 500-ə yaxın nümayəndə, eləcə də böyük beynəlxalq strukturlar və maliyyə qurumlarının aparıcı mütəxəssisləri qatılıb.

Forumun məqsədi Türkmənistanın neft və qaz sənayesinə birbaşa xarici investisiyaların cəlb edilməsi imkanlarını genişləndirmək, enerji sektorunun gələcək davamlı inkişafı üzrə regional dialoqu intensivləşdirməkdir.

Tədbir potensial investorların neft və qaz və qaz kimya sənayesində yeni investisiya layihələri, o cümlədən neft və qaz hasilatının optimallaşdırılması və Xəzər dənizinin Türkmənistan sektorunun şelfindəki yataqların işlənməsi barədə məlumatlılığını artıracaqdır.

Bundan əlavə, Forum çərçivəsində mühüm müqavilələr və memorandumlar imzalanacaq.

Forum işi sabah da davam etdiriləcək.