Avropa İttifaqı (Aİ) Şurası üzv ölkələrə koronavirus xəstəliyinə qarşı peyvəndləri və müvafiq testləri əlavə dəyər vergisindən (ƏDV) azad etməyə icazə verib. Şuranın bəyanatında bildirilir: "Aİ Şurası vahid ƏDV sistemi ilə əlaqədar direktivdə dəyişiklik edib. Üzv ölkələrə 2022-ci il dekabr ayının 31-dək COVİD-19 peyvəndlərini və testlərini, eləcə də peyvəndləmə üçün zəruri olan materialları ƏDV-dən azad etməyə icazə verilir. Aİ ölkələri qərar qəbul etdikləri halda bu məhsullar üçün azaldılmış ƏDV dərəcələrindən istifadə edə bilərlər”.
Qeyd edək ki, Aİ normalarına əsasən, üzv ölkələr öz ərazilərində ƏDV dərəcəsini özləri müəyyənləşdirə bilərlər, lakin Aİ ölkələri arasında vergi dempinqinə yol verməmək üçün bu verginin dərəcəsi 15 faizdən az olmamalıdır. Burada Aİ siyahısında ƏDV-nin 5 faizə qədər endirilməsinə icazə verilən mallar istisna təşkil edir. ƏDV güzəştləri ilə bağlı qərarlar isə Aİ Şurası tərəfindən təsdiq edilir.